فيه مواقف كتير قوى بتحصل لنا، وبيبقى جوانا ردود قوية نفسنا نقولها، بس غصب عننا بنضطر نبلع الردود دى ونرد بكلام تانى أكثر هدوءاً عشان ميتقالش علينا همج، رغم إن الرد اللى كتمناه جوانا ده بيبقى غالباً أبلغ رد على الهبل اللى بنسمعه...
قاعد مع قريبك الكبير الرخم...
- انتوا جيل بايظ.
الرد اللى بتضطر تقوله: معلش يا عمو مع إحترامى الكامل لحضرتك يعنى ده إختلاف أجيال وثقافات وأكيد جيلكم كان عنده خلافات مع الجيل اللى قبله برضه.
الرد اللى جواك: يعنى هو جيل أمك اللى كان سليم؟ بقى جيلنا إحنا اللى بايظ ياللى كنتوا بتشربوا السجاير اللى من غير فلتر من ورا أهاليكم؟ ياعم أستر نفسك جتكوا القرف!
نازل مشوار ومستعجل، والست والدتك راحت منادية عليك مخصوص جابتك من آخر السلم ...
- خلى بالك على نفسك، وبص كويس وإنت بتعدى.
- الرد اللى بتضطر تقوله: حااااااااااضر.
- الرد اللى جواك: لا تصدقى أضفتى كتير قوى بكلامك ده؟؟ انا فعلاً لولا الجملتين دول كان زمانى رميت نفسى تحت أول مقطورة قابلتها بس الحمد لله إنك لحقتينى!
مع مديرك فى الشغل...
- كل واحد يقولى حاجة ممكن تساهم فى تقليل تكاليف الشركة لأن الأرباح السنة دى نزلت.
- الرد اللى بتضطر تقوله: نعمل تحسين للإنتاج وتقليل لنسبة العيوب.
- الرد اللى جواك: إحنا نمنع المية والهوا عن الموظفين، وكل واحد يجيب معاه قزازة مية وأنبوبة أكسجين وهو جاى من البيت عشان يتنفس، وبكده نبقى وفرنا تكاليف ضخمة جداً، ولا أقولك هما يمشّوك من هنا والأرباح هتزيد لوحدها، هو فيه حاجة ودت الشركة فى داهية غير إدارتك الفاشلة؟ يا حماااااااااااااااااااار!
مع نفس مديرك فى الشغل...
- عايز الـ378 ريبورت اللى طلبتهم منك خلال ربع ساعة بالكتير.
- الرد اللى بتضطر تقوله: حاضر.
- الرد اللى جواك: يا بيه الحاجات اللى انت بتطلبها دى عيب وحرام وبيتهزلها عرش السموات والأرض!
فى الإنترفيو...
- قولى لى ليه إخترت شركتنا؟
- الرد اللى بتضطر تقوله: إخترت الشركة هنا لأنها بتتطور وتكبر بإستمرار وانا أحب جداً إنى أكون جزء من نجاح مؤسسة عظيمة زى دى.
- الرد اللى جواك: ياعم اخترت ايه؟ يعنى مانتاش شايف السوق واقف إزاى؟ انا ببعت السى فى بتاعى فى أى حته وخلاص والسنارة لقطت معاكم مش أكتر يعنى!
و فى ذات نفس الإنترفيو...
- اية أحسن ميزة فيك؟
- الرد اللى بتضطر تقوله: الدقة والإلتزام.
- الرد اللى جواك: عينيّا العسلى بروح أمك! اية السؤال الغبى ده؟ إنت أهبل يالا؟؟
فى إنتظار مواقف مماثلة منكم :D
أندرو جورج
06/02/2012
