فى فنّ الهرى: اللواء فى إطلاق الريح فى الهواء

الشركة الوطنية الدولية المهلبية للصناعات اللى تعجبك قوى ش.م.م

(دراسة حالة)

(مشهد 1)

غرفة مكتب فخمة شديد الإتساع، تحتوى على مكتب ضخم مهيب، بالإضافة إلى الكثير من الأرائك والكراسى الفخمة والتحف، ومائدة إجتماعات مستطيلة تقبع فى الجانب الغربى من الغرفة.

خلف المكتب الضخم يجلس شخص أشيب ذو كرش متدلى و يبدو عليه الخبرة –الرجل لا الكرش- ولكن رغم ذلك السن المتقدم فإن نظرات عينيه يبدو فيهما بريق من حماس الشباب. يظهر لنا الرجل ممسكاً بإحدى المجلات الإنجليزية التى إعتاد قضاء وقته أمامها فى الصباح أثناء شرب فنجان القهوة الخاص به.

“Latest studies conducted in over 200 organizations have proven that getting rid of negative energy on daily basis by means of employee group activities can increase the productivity amongst employees by up to 40% more.”

إعتدل الرجل فجأة فى جلسته وبدا عليه إهتمام شديد، ولكنه رغم إهتمامه لم يكمل القراءة، فقد إعتاد وهو المدير العام لتلك المؤسسة العريقة على أسلوب الفهلوة و "لقطها وهى طايرة"، وهذا الذى أوصله لذلك المنصب الذى لم يعد ينازعه عليه أحد بعد كل تلك السنوات من الخبرة حتى أصبح هو وذلك الكرسى ككتلة واحدة، لذلك فقد طوّح المجلة جانباً وقام بضغط أحد الأزرار فى مكتبه قائلاً بحزم:

"ماجدة...إجمعيلى كل المديرين بسرعة...بلغيهم إن فيه ميتينج مهم جداً معايا خلال ربع ساعة بالكتير."



(مشهد 2)

نفس الغرفة حيث يجلس المدير العام مع كبار مديرى الشركة حول مائدة الإجتماعات الكبيرة. يمسك كلاً منهم بقلم فى وضع الإستعداد للكتابة على الأوراق الموضوعة أمامهم، راسمين على وجوههم نظرة الطالب الدحيح الذى يحاول كتابة كل ما يقوله المدرس...

- المدير العام: انا جمعتكم النهاردة عشان موضوع مهم جداً، انا لاحظت إن الجو العام فى الشركة يفتقد للحماس، الموظفين والعمال وكل الناس داخله الصبح قرفانة ومعندهاش روح الإقبال على العمل خالص، فأنا إهتميت بالموضوع وبحثت فيه ولقيت إن أحسن طريقة هى إننا نعمل نشاطات جماعية مشتركة للشباب بتوعنا بشكل يومى ثابت ولو لمدة نص ساعة حتى، بحيث نساعدهم على إخراج الطاقات السلبية اللى عندهم وده هيخليهم مبسوطين ويقبلوا على العمل أكتر خلال اليوم، ها اية رأيكم؟

- مدير مـ**ـص 1: دى فكرة ممتازة يا أفندم! فعلاً الموظفين عندهم إحباط عشان مش بيعملوا نشاطات يومية بره الشغل.

- مدير مـ**ـص 2: فكرة رائعة وبتصب فى مصلحة ولادك كالعادة يا أفندم، وكالعادة برضة بنتعلم من حضرتك إزى نهتم بالناس بتوعنا ونخليهم هما الأولوية فى أى قرار بناخده...إحم...بعد الرجوع لحضرتك فيه طبعاً.

- مدير مـ**ـص 3: انا مع حضرتك قلباً وقالباً. طب ايه رأى حضرتك نعمل دورى كورة وشطرنـ...

- المدير العام (مقاطعاً): لأ لأ سيبك من التفاصيل انا ورايا حاجات كتير النهاردة، انا عايز كل واحد فيكم ينفذ الفكرة فى إدارته وييجى بس يقولى النتيجة اللى هو وصل لها مع الناس بتوعه بعد أسبوع من النهاردة. تقدروا تتفضلوا.

(مشهد 3)

مدير مـ**ـص 1: مجتمعاً فى غرفة مكتبه بفريقه...

مدير مـ**ـص 1: ...وعشان نزود من طاقتكم الإيجابية انا أقترح إننا نعمل نص ساعة نفضل نتف فيها على الشجر فى الجنينة، وكل واحد فيكم يتخيل الشجرة اللى قدامه أكتر شخص بيكرهه فى العالم.

موظف مـ**ـص 1(محدثاً نفسه): وانا هتف على مين غيرك يابن الـ...

مدير مـ**ـص 1: بتقول حاجة يا مجدى؟

موظف مـ**ـص 1: لا يا أفندم بقول دى فكرة رائعة، انا أساساً بقعد أتفتف طول اليوم لوحدى على سبيل التسلية.

مدير مـ**ـص 1: ها اية رأيكم؟ لو حد عنده إقتراحات تانية يقول انتوا عارفين انا بحب أسمعكم.

موظف مـ**ـص 2: انا شايف إنها فكرة عبقرية، ممكن كمان كل واحد فينا يلزق صورة مراته أو حماته على الشجرة عشان يتف بقلب كده.

موظف مـ**ـص 3: إحنا ممكن كمان نقسم الأرض مسافات ونعمل مسابقة أبعد تفه.

مدير مـ**ـص 1: هايل! انا سعيد جداً بالحماس اللى عندكم ده، هنبدأ من النهاردة إن شاء الله.

(مشهد 4)

مدير مـ**ـص 2 مجتمعاً فى غرفة مكتبه بفريقه...

- مدير مـ**ـص 2: ...وبناء عليه، انا أقترح إننا كل يوم الصبح أول ما نوصل الشغل، هنقف فوق سطح المبنى وكل واحد يمسك إيد زميله اللى جنبه ونعمل ببى سوا فى نفس الوقت.

- موظف 1: أفندم؟!

- مدير مـ**ـص 2: خير يا محمود؟ انا شايفك قاعد أصلاً باصص بإستهتار كده للكلام من ساعة ما بدأنا الإجتماع، ودلوقتى بتسأل بإستنكار، فيه حاجة؟

- موظف: يا أفندم إيجابية اية اللى حضرتك بتتكلم عنها دى؟ مانتوا عارفين الناس متضايقة وقرفانة ليه، الناس مسحولة فى الشغل ومعندهاش تأمين ولا بتقبض كويس وبتتعامل معاملة زى الزفت و...

مدير مـ**ـص 2 (مقاطعاً بإنفعال شديد): إنت هتفضل طول عمرك كده، إنسان سلبى رافض التطوير، لو كان تفكيرك إيجابى كنت تعاونت وساعدت فى تطوير المؤسسة العظيمة اللى انت شغال فيها، لكن مفيش فايدة وكل مره أديلك فرصة عشان تصلح من نفسك مش بتستغلها.

- موظف: يا أفندم بس ده...

مدير مـ**ـص 2 (مقاطعاً فى غضب): خلاص خلص الكلام متضيعش وقت الإجتماع سيب زمايلك يتكلموا، اية رأيكم؟

موظف مـ**ـص 1: فكرة ممتازة، انا هشرب صاروخين بيبسى الصبح وانا جاى فى العربية أساساً.

موظف مـ**ـص 2: انا هجيب دوا مدر للبول ليا ولزمايلى كل يوم، انا كمان بقترح إننا نقسّم الأرض مسافات ونشوف مين فينا هيجيب أكبر مسافة وياخد جايزة تقديرية بسيطة.

موظف مـ**ـص 3: هتعاون مع زمايلى حتى آخر نقطة يا أفندم، بس انا عندى سؤال، هو إحنا لو كنا ماسكين إيدين بعض إزاى هنـ...

مدير مـ**ـص 2: مش عايزين نتكلم فى تفاصيل فردية، انا بحب أسيب مساحة للكريتيفيتى لكل واحد عشان يبدع، إتصرف وأبدع بقى، ولا إنت عايزنى آجى أقول لك تعمل ببى إزاى كمان؟

يضحك الفريق بشدة على قفشات المدير اللطيفة...

(مشهد 5)

مدير مـ**ـص 3 مجتمعاً فى غرفة مكتبه بفريقه...

مدير مـ**ـص 3: نص ساعة Meditation كل يوم فى المكتب على الأرض، تصفّى النفس وتجيب لكل واحد الـInner Peace اللى محتاجه، واللى هيتحرك من مكانه خلال النص ساعة هياخد على قفاه...

...

(مشهد 6)

غرفة المدير العام فى إجتماع مع المديرين بعد أسبوع...

مدير مـ**ـص 1: التجربة كانت ممتازة يا أفندم وجابت نتائج رائعة، والأسبوع ده حققنا زيادة فى المبيعات أكتر بـ20%.

مدير مـ**ـص 2: التجربة يا أفندم كانت ناجحة نجاح شديد، وكشفت لنا عن بعض الموظفين السلبيين اللى كانوا بيعرقلوا التطور فى الشركة وطردناهم عشان إحنا مش هنسمح لحد ينشر السلبية داخل الشركة بعد النهاردة.

مدير مـ**ـص 3: إحنا الموظفين عندنا بقوا بيتمتعوا بهدوء داخلى وإيجابية رهيبة يا أفندم من يوم ما نفذنا فكرة حضرتك الرائعة.

المدير العام: انا فخور بكم جداً وبعتبركم دراعى اليمين فى كل حاجة وبعتمد عليكم فى تطوير وتحسين المؤسسة دى دايماً وإنتم بتثبتوا لى كل مرة إنكم أهل للثقة، انا هبلغ ماجدة تعمل لى ورقة بمكافأة 3 شهور لكل واحد منكم.

(مشهد 7)

نفس المدير العام نراه يجلس فى نفس المكان، ممسكاً بإحدى مجلات المنوعات، وعيناه تطالعان الصور والعناوين فى رشاقة...

"لقد ساعدنى الرقص الشرقى منذ طفولتى على إخراج جميع طاقاتى الكامنة، وكم أتمنى أن يمارس الجميع الرقص الشرقى فى كل مكان حتى يخرجوا طاقاتهم مثلى."

- الراقصة صافينار

يعتدل الرجل فى جلسته فجأة ويبدو عليه الإهتمام الشديد...

== تمت ==