انا عايز بس أتكلم عن جملة الفيلم الفلانى "مسروق" من كذا اللى فيه ناس كتير بترددها وبتشيرها كل شوية عالفاضية والمليانة.
فيه كتاب مشهور جداً فى كتابة السيناريو إسمه Save the Cat! للكاتب Blake Snyder. الفصل التانى فى الكتاب على طول كده الكاتب قرر يسميه عنوان هيختصر كل اللى انا هقوله:
Give me the same thing...only different!
الكاتب بيقول ما معناه إن -من الآخر- كل حاجة تتخيلها أو متتخيلهاش اتحكت بالفعل قبل كده، وإن كل حاجة إحنا هنكتبها هتكون مجرد تنويعة على تيمة من مجموعة تيمات هو لخصها فى الكتاب. مش بس كده، الكاتب كمان بيطلع لسانه للكل، وبيقول لو حد فيكم عمل فيها أبو العريف وشاف إنه عرف يخترع تيمه جديدة خارقة غير اللى انا كاتبهم دول، ياريت يبقى يلاغينى. هو قصده إنه يقول لك إن مش مطلوب منك ككاتب تخترع الذرة، لأن من الآخر مش هتعرف، مهما كنت فاكر نفسك مين! لكن كل اللى هتعمله إنك هتدينا نفس الفكرة، بس نوّع فيها وغيّرها، وإحكيها بطريقتك.
فعلاً كل قصة عبارة عن تنويعة على قصة أو مجموعة قصص قديمة، ومش قديمة بمعنى إن فيلم جديد مقتبس عن فيلم قديم شوية مثلاً، لأ، الموضوع أبعد من كده بكتير. انت لو تتبعت سلسلة الأفكار بضمير ممكن تفضل تمشى لغاية ما توصل مثلاً إلى إن أصل الفكرة أسطورة من الميثولوجيا الإغريقية أو الفرعونية من سنة معرفش كام قبل الميلاد.
بناء عليه، عايزين نبطل الجملة الساذجة بتاعة الفيلم "مسروق" دى، إلا لو الفيلم فعلاً لاطش مشاهد أو أحداث كاملة بشكل فج (زى مثلاً أول مشهد فى فيلم الهرم الرابع)، لكن لو كل ما هنشوف فكرة قريبة من فكرة تانية هنقول لفظ "مسروق"، هنفضل مشاهدين سذج كده، وهيبقى شكلنا عبيط.
هتكلم على سبيل المثال على الفيلم العظيم "خط دم" اللى كان هيجيب لى شلل وانا بشوفه. إحنا نسلخه عشان هو فيلم تعبان فنياً ماشى، بس موضوع إنه مسروق من قصة/فيلم Pet Sematary ده كلام خيبان قوى، أى حد بيقوله عنده جهل وإنعدام نضج للأسباب السابق ذكرها.
وعلى سبيل التسالى، خلينا نتتبع ببحث بسيط أصل Pet Sematary شخصياً اللى المدعين دول بيتعاملوا معاه على إنه الفكرة الأوريجينال اللى ستيفن كينج خلقها من العدم.
-----------
1) خيط دم (2020): فيلم بيتكلم عن إتنين متجوزين إبنهم حصل له حادثة وخلاص قرب يموت، فهيقرروا يحولوه مصاص دماء عشان يعيش. مش هدخل فى تفاصيل الأحداث لأنها متخلفة، والقصة مفككة جداً، لكن دى الفكرة العامة يعنى.
2) رواية Pet Sematary (نشرت عام 1983) هى رواية حلوة لستيفن كينج. بتحكى عن واحد سكن هو وعيلته جنب مدافن ما مريبة كده، وصاحبنا هيعرف إن المدافن دى أى حيوان بيتدفن فيها بيرجع حى تانى. المهم صاحبنا ده إبنه هيموت فى حادثة فهيقرر يجرب الموضوع فى إبنه شخصياً! وإبنه هيرجع للحياة فعلاً، بس "مش هيكون هو إبنه بالظبط، ولكن فيه حاجة غلط مخيفة مش قادر يحددها". التيمة المرعبة الشهيرة بتاعة إن حد يختفى ويرجع، بس يكون مخيف بعد ما رجع. انا ممكن أعدّ من ذاكرتى دلوقتى عشرين فيلم رعب وخيال علمى على نفس التيمة دى. المهم يعنى إن الرواية دى إتعلمت فيلم مرة سنة 1989، ومرة سنة 2019 (وده اللى غالباً الأذكياء الجدد بيشيروا إليه، وبيقولوا إن الفيلم العربى "مسروق" منه).
3) الرواية دى بقى هى الأصل؟ لأ طبعاً ما قلنا مفيش حاجة إسمها "الأصل"! الأفكار لا تفنى ولا تستحدث من عدم.
الحقيقة إن الرواية دى ستيفن كينج استوحاها من قصة قصيرة إسمها The Monkey's Paw تأليف W. W. Jacobs واتنشرت سنة 1902. بتحكى ايه القصة دى؟ عن راجل ومراته هيلاقوا مخلب قرد متحنط مسحور وده بيمنحهم 3 أمانى بيتنفذوا بس توابع الأمانى دايماً بتكون وخيمة، والاتنين دول إبنهم هيموت، وهيتمنوا إنه يرجع من الموت، وهيرجع فعلاً بس هيبقوا شاكين إن الشىء اللى رجع ده ممكن "ميكونش إبنهم بالظبط" إلخ… طبعاً التشابة واضح.
4) هل The Monkey's Paw هى الأصل؟ برضه لأ طبعاً، لكن الرواية دى بدورها مستوحاه من 3 مصادر مختلفة:
- ألف ليلة وليلة - قصة علاء الدين والمصباح السحرى: دى جت منها تيمة التلات أمانى. (تم تجميع ألف ليلة وليلة على مدى عدة قرون ومحدش عارف لها تاريخ)
- مسرحية Doctor Faustus بتاعة كريستوفر مارلو: ودى جت منها تيمة إنك تبيع نفسك للشيطان عشان تحصل على مكاسب دنيوية، لكن العواقب بتكون دايماً وخيمة. (يقال إنها ظهرت لأول مرة حوالى عام 1592)
- الكتاب المقدس: واللى جه منه تيمة إقامة الموتى. (إنجيل يوحنا يقال انه اتكتب بين سنة 70م إلى سنة 110م).
5) طب لو مسكنا خيط مسرحية Doctor Faustus مثلاً ومشينا وراه، هنلاقى إنها مستوحاه من أسطورة ألمانية قديمة إسمها Faust. طب لو أخدنا Faust هنلاقيها إن أساسها كفكرة هى مبنية على خطية الغرور أو الـVanity اللى بتدمر صاحبها فى النهاية، ودى مثلاً كانت موجودة فى قصة Narcissus فى الميثولوجيا الإغريقية إلخ… إفضل بقى فى التتبع ده من هنا للسنة الجاية واللى الناس بتوع الدراسات الأدبية بتعمل فيه دكتوراة.
هنا نحب نسأل الناس اللى بتزعم إن فيلم خط دم ده "مسروق من" فيلم Pet Sematary: طب ليه ميكونش -على حد تعبيرهم- "مسروق" من أى حاجة من الحاجات التانية اللى ذكرناها يعنى؟ ما كلهم متشابهين!
هما قرروا إنه "مسروق" من الفيلم ده بالذات لأنهم ميعرفوش غيره، يعنى نظرهم ومعرفتهم ميجيبوش أبعد من كده. الحقيقة ببساطة هو إن مفيش سرقة، بس فيه أفكار بتتضرب فى الخلاط منذ قدم التاريخ ويعاد إنتاجها، وبتطلّع لنا حاجة شكلها مختلف شوية كل مرة مش أكتر. زى ما بدأنا الكلام:
Give me the same thing...only different!
الحقيقة كمان هى إن الموضوع مش تسلسل أفكار خطّى Linear (يعنى ألف أخد من باء، وباء أخد من جيم، وجيم أخد من دال) زى الشكل المبسط اللى عرضته ده، لكن الأفضل النظر للموضوع على إنه Network متشابكة ومعقدة، وكل Node فى النتوورك دى بياخد أفكاره من شوية Nodes تانية حواليه، بيضربها فى الخلاط ويطلع حاجة جديدة شبه اللى كانت قبلها، only different.
ختاماً، نكرر طلبنا للأستاذ أبو العرّيف إنه يرحمنا من الملاحظة الذكية بتاعة "هاهاها ياعم ده مسروق من فيلم كذا"، ونبدأ ننضج فكرياً، ونفهم إن كل الحكاوى خلصت بالفعل تقريباً منذ بدء الخليقة، وإننا من ساعتها بنلف فى نفس الدواير، وبنعيد إنتاج نفس الأفكار، ولكن مع تغييرات طفيفة جداً.
شكراً.
